Andreas kom heim til kjekk jobb og fritid
– Det var veldig spennande å komma inn i denne nye jobben hos SMART Automation. Eg blei møtt på ein god måte frå første dag, blei vist rundt og fekk sett opp alt som eg trengte for å starta, PC, kontoar, program og sånt. Slik fortel den nytilsette serviceingeniøren Andreas Alendal (26) om då han i mai 2024 kom på jobb i ny bedrift.
Andreas er enda under opplæring. Det er mykje nytt han skal bli kjent med, nye produkt og system, korleis programvara fungerer, installasjon, ulike fartøy og service. Når tida er inne reknar han med å ta til med reising ut på serviceoppdrag. Det gler han seg til, og veit at det er gode folk å konsultera der heime om nødvendig.
Bratt læringskurve skremmer ikkje
– Det har vore ei bratt læringskurve, fortel Andreas. Eg kom frå ei praktisk side av faget, her blei det også ei teoretisk side, nye måtar å tenka og jobba på. Det har vore ei mykje nytt, men ei veldig god oppfølging frå kollegaer. Og så var det jo akkurat dette eg sikta mot! Her var dei tydeleg på at eg berre måtte spørja. Når ein er ny kan ein jo ikkje alt… — Det følast trygt at eg kan ringa om det dukkar opp ting når eg er ute på oppdrag som eg treng assistanse på. Og så har me jo ein del «guruar» som er kjempedyktige på dette. Det er godt å vite.
Andreas kom frå ei stilling i ei anna Bømlo-bedrift der han jobba som automatikkar i om lag tre år. Har ønska seg inn i SMART ei stund fordi han syns denne bedrifta virka utruleg spennande. Frå industri til båt, meir automasjon, programmering, systemforståing og setja seg inn i den sida av automasjon. Det faglege drog, i tillegg til at reisinga verka attraktiv. Og så kjende eg fleire av dei som jobba i SMART frå før, og visste litt om korleis det det var å jobba der. Og med 3–3‑rotasjon, tre veker på og tre veker fri, har eg høve til å gjera ting eg elles ikkje kunne.
Tar vidareutdanning mens han jobbar
Med fagbrev som automatikkar fortel Andreas at han har ei plattform for vidare utdanning i faget. No held han på med eit løp med fagskulen på automasjon i fritida. Etter fagskulen blir han fagingeniør. Så kan han vurdera bachelor etter det igjen, om han framleis er svolten på høgare utdanning. Han fortel at studiet han no er inne i blir gjennomført på Fagskulen Nord, delvis nettbasert med nokre veker fysisk oppmøte. – Det er ein fin kombinasjon å ta utdanning når ein har tre veker på og tre veker av, men ein må jo passa på å ha fritid og!
DJ på fritida – veldig kjekt!
Andreas har budd på Bømlo i mest 11 år, Bømlo er heim! Han har kjøpt sin eigen bustad Stavlandsneset. Han har slekt herifrå og har vore ein del på Bømlo i oppveksten, men då han starta på yrkesskulen i Rubbestadneset blei han godt integrert. – Der fekk eg venner for livet, fortel han, og dessutan bur både mor, mormor og ei søster her på Bømlo.
Når det gjeld fritida blir Andreas entusiastisk og ekstra framoverlent. – Eg leiger meg ut på spelejobbar som DJ og lagar elektronisk dansemusikk (EDM) i mitt eige heimestudio, til dømes pop, house og sånn.
Me får vera med Andreas på DJ-jobb, og det svingar verkeleg når tunge rytmar fyller det store lokalet. Me sjekkar, og finn ut at EDM hovudsakleg betyr instrumental musikk, der ein nyttar elektroniske instrument som synthesizer, trommemaskiner, samplerar og effektar. Og det funkar så det susar når lokalet etter kvart fyllest med festglade folk som svingar seg til Andreas sine tonar og rytmar.
Den gode følelsen
Andreas føler han får ting til, at han trivest og får ansvar. Han kjenner på at han utviklar seg og trur det er viktig for mange at dei får ansvar. – Det er viktig å føla seg sett, vera ein del av laget og spela godt med, understrekar han. – Det er folka og arbeidet her som gir meg «yesss-følelsen», og bekreftar at eg har valt rett.
Dei viktigaste kriteria når det gjeld jobb er trivsel og miljø, folka du jobbar med, summerer Andreas Alendal opp: Gode kollegaer…, det betyr meir enn du skulle tru!
Andreas Alendal
Stilling/funksjon: Serviceingeniør
Alder: 26
Utdanning/bakgrunn: Fagbrev som automatikkar, held på med vidareutdanning i fagskulen på automasjon på fritida.
Starta i SMART Automation: Mai 2024
Lyst å vite meir?
Ta kontakt via info@smartautomation.no,
eller ring oss på +47 53 42 88 00 for å høyre mer!
SMART Automation AS
Hollundsdalen 5
5430 Bremnes, Norway